Orkuveita Húsavíkur

Yltjörnin sunnan við bæinn verður sífellt vinsælli viðkomustaður bæjarbúa og ferðamanna. Í yltjörnina rennur kælivatn frá Orkustöð í Hrísmóum, um 25°C heitt. Tjörnin er vinsæl til baða, ekki síst af því að þar er hægt að synda innan um kynstrin öll af gullfiskum sem lifa þar blómlegu lífi. Nýverið fréttist af áhuga kafara á lífríkinu í tjörninni, en skrautlegir fiskarnir þykja góðar og skemmtilegar fyrirsætur. Heimsþekktur kafari og ljósmyndari, Alex Mustard (www.amustard.com) var þarna á ferðinni um daginn í þeim tilgangi að ná myndum af lífríkinu í vatninu. Hann lét Orkuveituna fá gullfiskamyndina sem fylgir með fréttinni.

Starfsmenn Orkuveitu Húsavíkur vinna núna að því að endurnýja 90mm PE lögn fyrir DN100 stállögn frá tengibrunni við Heiðargarð og fram yfir heimtaug við Haga, um 1500m. langur kafli. Nú er búið að sjóða saman á bilinu 80-90% röra en verkið er í biðstöðu vegna veðurs. Þegar veður batnar verður lokið við að sjóða saman rör og setja krumphólka. Þessari aðgerð er ætlað að tryggja nægan vantsþrýsting á bæjum á kaflanum frá Heiðargarði og að Haga. Þetta er fyrri áfanginn af tveimur í því skyni að bæta vatnsþrýsting á svæðinu. Seinni áfanginn, sem vonir standa til að hægt verði að fara í að ári, verður fólginn í því að skipta út lögn frá Haga og að tengibrunni á gatnamótum við Ytra Fjall en með því verður hægt að hækka þrýsting alla leið í Lindahlíð.

Eins og áður hefur verið greint frá er verið að gera dæluprófanir í Auðbrekku, borholu milli sjúkrahúss og fótboltavallar. Tilgangurinn er sá að meta afköst holunnar, hitastig ofl.

Dælan var sett niður þann 27. apríl og byrjað að dæla samdægurs. Fóðringin í holunni er 21 metri og dælan er á 20,5 metra dýpi. Tíðnibreytir er notaður til að stýra afköstum dælu, þannig að hægt er að sjá hvernig vatnshæðin í holunni breytist við mismunandi rennsli. Hitastigið á vatninu er um 42,8°C